აქტიური დაბერება ეს არის პროცესი, რომელიც უზრუნველყოფს ჯანმრთელობის, უსაფრთხოების და სოციალურ ცხოვრებაში მონაწილეობის მიღების შესაძლებლობის ოპტიმიზაციას, ადამიანის ასაკის ზრდასთან ერთად ცხოვრების დონის ამაღლების მიზნით. არსად ისე სწრაფად არ ბერდება ადამიანი, როგორც სავარძელში და არ შეგვიძლია ამას არ დავეთანხმოთ. შრომას, კმაყოფილებას საკუთარი შრომით და აქტიურ კავშირს საზოგადოებასთან თვლიან უმნიშვნელოვანეს ფაქტორად, რომელიც აფერხებს დაბერების პროცესს და პოზიტიურ გავლენას ახდენს სიცოცხლის ხანგრძლივობაზე. 

ჯერ კიდევ სოფოკლე ამბობდა: „ადამიანი არ კვდება, ის ნელ-ნელა იკლავს თავს“. ყველაფერი ეს კიდევ ერთხელ ადასტურებს იმას, რომ ჯანსაღი წესით ცხოვრება უმნიშნველოვანესია, რათა თავიდან ავიცილოთ დაბერებასთან დაკავშირებული ნეგატიური შედეგები.

ხანდაზმულ ასაკში ადამიანი მეტად უნდა ზრუნავდეს კვებაზე, ვიდრე ადრე. რატომ? ფიზიოლოგები ამ კითხვაზე გვპასუხობენ, რომ ასაკთან ერთად უარესდება საკვების გადამუშავება და შეწოვა. ნაკლებადმოძრავი ცხოვრების გამო ხდება ნაწლავების პერისტალტიკის შესუსტება, ვითარდება ყაბზობა. ხანგრძლივად მედიკამენტების მიღების გამო ვითარდება ბ ჯგუფის და კ ვიტამინების ნაკლებობა. ბევრ ადამიანს ასაკში ეწყება უმადობა. ასაკოვნებს განსაკუთრებით ესაჭიროება ცილები, ვიტამინები, მიკროელემენტები, უჯრედისი.

რჩევები:

1. იყავით ფიზიკურად აქტიური, ივარჯიშეთ საშუალოდ სამჯერ კვირაში, ისე რომ, მიიღოთ სიამოვნება. ერიდეთ ზედმეტ დატვირთვას, რომ არ მოხდეს თავისუფალი რადიკალების გააქტიურება;
2. შეამცირეთ რაციონში ნახშირწყლების რაოდენობა. ნახშირწყლოვანი საკვები სალათებით, ხილით და ბოსტნეულით შეცვალეთ;
3. კვების რაციონში ჩართეთ ანტიოქსიდანტური დანამატები. ისინი ანეიტრალებენ თავისუფალი რადიკალების მოქმედებას;
4. დაატენიანეთ ორგანიზმი, დალიეთ დღეში ორ ლიტრამდე წყალი;
5. მიიღეთ ორგანიზმისთვის აუცილებელი მაღალეფექტური ვიტამინები და მინერალები;
6. განაგრძეთ საკუთარი თავის სრულყოფა. გონებრივი და ფიზიკური აქტივობა დაბერებისთვის დროს არ დაგიტოვებთ;
7. შთააგონეთ საკუთარ თავს, რომ ასაკს საზღვრები არ აქვს; მიზნად დაისახეთ, 125 წელი იცოცხლოთ!
8. შეამცირეთ მიღებული საკვების რაოდენობა  - ჯანმრთელობისათვის მსხვერპლი გაიღეთ და სამზარეულოდან მანამ გამობრძანდით, სანამ საკმაოდ დანაყრდებოდეთ;
9. თუ ვერ იტანთ თქვენს სამუშაოს, მიატოვეთ იგი, რადგან მუდმივი სტრესი აჩქარებს დაბერებას;
10. მიაღწიეთ იდეალურ წონას და შეინარჩუნეთ იგი. ჭარბი წონა სტრესისა და დაბერების გამომწვევია;
11. თუ თევზს კვირაში 3-4 ჯერზე იშვიათად მიირთმევთ, მაშინ თქვენს რაციონში ჩართეთ ცხიმოვანი მჟავებით გამდიდრებული დანამატები;
12. გაამრავალფეროვნეთ თქვენი რაციონი, რადგან ალერგია ყველაზე ხშირად ერთფეროვანი საკვების მიღებისას ჩნდება;
13. ხილი და ბოსტნეული თქვენი რაციონის მნიშვნელოვანი ნაწილი უნდა გახდეს, რადგან ისინი დაბერებასთან დაკავშირებულ ბევრ დაავადებას თავიდან აგაცილებენ. ეცადეთ,  კვირაში ბოსტნეულისა და ხილის სულ მცირე შვიდი ულუფა მაინც მიიღოთ;
14.  იქონიეთ მჭიდრო კავშირი საზოგადოებასთან, მეგობრებთან და ახლობელ ადამიანებთან, ერიდეთ იზოლაციას. აუცილებელია გქონდეთ ცხოვრების მიზანი და საკუთარი ღირსების გრძნობა;
15. მინიმუმადე შეამცირეთ ალკოჰოლის მიღება. ანტიოქსიდანტური თვისებების გამო სასარგებლოა დღეში ერთი ჭიქა წითელი  ღვინო. უფრო დიდი დოზებით ალკოჰოლის მიღება ორგანიზმს არ სჭირდება.
16. ნუ გაატარებთ დაუცველი კანით დიდ დროს მზეზე და ნუ გაგიტაცებთ ხელოვნური ნამზეური. გარეთ გამოსვლისას წაისვით კანზე მზისგან დამცავი კრემი. გამოიყენეთ მზის სათვალე – ის არა მხოლოდ მხედველობის შენარჩუნებაში გეხმარებათ, არამედ თვალების მოჭუტვის აუცილებლობისგანაც გაგათავისუფლებთ.

 

გაახალგაზრდავებისთვის იღწვის ადამიანი იმ დღიდან, რაც თავს დაბერება შეატყო, დაბერების პროცესი აღიქვა და ძველი დრო - ახალგაზრდობა - ინატრა. დაბერების პროცესებზე, სიკვდილზე და სიცოცხლის გახანგრძლივების მექანიზმებზე ბევრი საუბარი შეიძლება. ბოლოს და ბოლოს ამ სფეროს ხომ ცალკე დარგი იკვლევს.

ასეა თუ ისე, მეცნიერება კვლავ განაგრძობს კვლევებს დაბერების და სიკვდილის პროცესების საიდუმლოებების გამოსააშკარავებლად. რაც უფრო ღრმად იხედებიან მკვლევარები იდუმალ კუთხეებში, მით უფრო მეტი თავსატეხი უჩნდებათ, მაგრამ სიბერის საბოლოოდ დაძლევა მაინც ვერ შეძლეს.

თუმცა არ ვიცით  გვსურს კი ეს? რა საჭიროა უკვდავება? გვაქვს თუ არა უფლება, რომ მოვითხოვოთ უკვდავება?

“უკვდავების ელექსირის” მოლოდინში გარინდებულებს, ისღა დაგვრჩენია, რომ უარი ვთქვათ მავნე ჩვევებზე, ვიყოთ ფიზიკურად აქტიურნი, ვიკვებოთ სწორად და შეძლებისდაგვარად შევინარჩუნოთ ამაღლებული განწყობა. სამყარო ხომ სარკეა. თუ გაუღიმებ, გაგიღიმებს.